دابا شكون اللي كان كيظن أن الحل للمشاكل ديال التعليم العالي غيكون هو تبديل حرف؟ السيد ميراوي مشا وجا بلاصتو السي ميداوي، بحال إلا تبدلنا الراء بالدال و سالينا! أنا ماشي باغي نكون متشائم، ولكن واخا كنتفاءل بالناس، الظن ديالي كيطلع فالصواب مرات قليلة… وبما أن كل واحد عندو نصيب من سميتو، الميراوي فعلاً عطانا المرارة و جاب للمغاربة القنطة، خصوصاً فالقضية ديال الطلبة ديال كلية الطب اللي عياو بالاحتجاجات.
دابا السي ميداوي، الله يسخر، اللي حتى هو عندو اسم كيوحي بالتداوي، واش يقدر يشافي لنا المرارة اللي خلّاها الميراوي؟ واش غادي يصلح داك الشي اللي خسروا السي ميراوي؟ هادشي اللي غادي يبين مع الوقت… ولكن الله يحفظنا من داك تبديل الحروف!
